Animasyen Sepil Jaku Iban

Ensera Pelanduk seduai Tekura enggau Sementing Raja

Dulu kelia, mayuh bansa jelu diau di kampung jerung ti dikumbai menua Lepung Bebelat. Menua tu nadai kala ditujah bala anak mensia. Enda kala alai orang ngasu beburu. Naka pengelantang-lantang mih jelu baka Pelanduk, Tekura, Jugam, Sawa, Angkis, Kera, Baya enggau jelu bukai diau di menua nya. 

Pagi siti, bejalai Tekura enggau Pelanduk ngagai Nanga Selepung laban deka ngiga buah sibau mansau nyadika pemakai. Sekumbang ke bejalai, nadai mih seduai tetemu ka pun buah nya. Nyau ngalih hari, seduai datai ba endur siti dalam kandang menua nya lalu tepedaka pun buah sibau rinda lebat amat buah benung mansau. Pengelapar perut endang enda ulih tatka agi laban sepagi-pagi nya lalu enda makai utai.         

“Endai Sambi, bakani chara tua deka ngulihka buah sibau nyin? Tubuh nuan nya regup-regup ngapa tang enda nemu niki. Aku tu, gamal ke besai tang peturun kami enda kala betikika pun kayu. Tu peda nuan ,semina dua igi buah sibau ke ngachir sebelah tanah. Enti dibagi nadai endar. Enda chukup ka empa tua,” ku Pelanduk.

“Akan Pelanduk, uji nuan nengkadah ke atas ngagai puchuk sibau. Nyau beteguyat dan kayu muak ke sepiak kanan nyin. Sambi Ular Sawa benung ngulihka buah sibau nyin. A…bis buah sibau nya dipajuh iya lagi. Enda ampit tua ka diau di tanah ditu,” ku Tekura bejaku sambil nunjukka jari chawit iya ngagai dan kayu ka dipadahka iya nya.           

Pelanduk lalu malik ke atas puchuk kayu munyi ke dipadahka Tekura. Peda besai amat ular sawa benung nengkilung melit dan sibau.   

“Ular sawa nya asuh ngulihka buah sibau nya nih,” ku Pelanduk nelai Tekura.

“Sambi Sawa, uji nuan ngulihka kami duai Tekura buah sibau nya lalu buai ke baruh kitu. Bini kami duai benung betubuh bisi lalu tetenguk deka makai buah sibau mansau. Minta tulung nuan mih kami duai tu Sambi,” ku Pelanduk.           

“Nama balas seduai ngagai aku enti aku ngulihka buah sibau nya dih?” tanya Ular Sawa.

“Eh…eh…tak enggai enda minta balas Sambi tu. Bakatu ku iya Sambi. Tembu nuan ngulihka buah sibau nya lagi. Nurun nuan ke baruh, ditu kitai begempuru makai buah sibau. Kenyang lagi nuan terus tinduk. Kami duai Tekura nyaga nuan tinduk enggaika munsuh ngachau nuan,” ku Pelanduk.           

Ensera Numbit Bandir Tapang

Gajah sida Badak baum ba pulau tanah siti. Nyadi ba pulau nya tumbuh kayu ke bebesai baka tekam, keladam enggau madang tapang. Bandir tapang mayuh agi ke nyau ka baka dinding empa pemesai.

Nyadi seduai baum laban deka muka pengerami mimit, serambi ke dikena ngingat ke pengelama seduai ke udah bepangan enda belaya agi. Tembu seduai ke baum, seduai lalu ngiga mayuh macham utai ke nyamai diempa, baka buah sebelah kampong enggau buah bukai semak kampong melayu.

Udah nya, seduai lalu ngambi buah nyiur enda jauh ari kampong melayu sereta enda jauh ari tebing tasik. Ku seduai buah nyiur kena ngupah sapa orang tetumbit ke bandir tapang sereta lalu tekebus ka iya. Nyadi endur bandir tapang tu enda jauh ari seduai ti deka muka pengerami nya.

Seninjik bendar lebuh nya mega, Pelanduk pan datai ngagai seduai kia. Nama agi dih Pelanduk tu endang orang pintar.

“Apu! Nama utai dikereja seduai ditu dih samba?” ku Pelanduk nanya seduai.

Dia Gajah seduai Badak lalu nusui semua leka aum seduai ti deka muka pengerami mimit ngagai Pelanduk. Dilah Pelanduk seruran kelur-kelur sereta tuchum legup ninga berita seduai. Gajah seduai Badak lalu ngasuh Pelanduk nesau semua jelu dalam kampung ngasuh sama datai ngagai pengerami nya. Pelanduk lalu madah ke pengaga ati diri ninga berita nya, lalu iya pan lalu nyanggup betesau sebelah menua nya dia.

Udah nya Pelanduk lalu mupuk madah ke Sambi Tekura ti endang sulu iya. Seduai iya baum lemai nya. Lebuh seduai ti baum tu tadi dia Pelanduk lalu bisi runding enggau akal ti manah.

“Sambi”, ku iya nganu Tekura. Pala Tekura lalu enchekul mimit mending ke jaku Pelanduk. “Manah nuan ngambi nyiur ba sida Baginda Rajah Landak.”

“Eh! Kapa guna nya Sambi?” ku Tekura nanya.

“Anang guai nanya dulu,” ku Pelanduk. “Lagi nuan nemu, ti aku madah ke nuan.

Ensera Singa enggau Chit

Chunto kereban ngajar ti ngena videomaker

Chara ngena moviemaker

1. Giga gambar enggau lagu dalam enjin pengiga ba Google tauka enjin pengiga bukai. 

2. Simpan gambar enggau lagu ti dipilih dalam siti folder ngambika nyamai digiga.

3. Buka aplikasyen moviemaker ti bisi dalam komputer tauka bekenaka aplikasyen bukai.

4. Tekan ba "Add videos and photos" lalu pasukka gambar ti digiga dalam enjin pengiga tadi.

5. Tekan ba "Add music" lebuh maya kitai deka masukka audio.

6. Tekan "Title" lebuh masukka topik video ti digaga kitai.

7. Tekan "Caption" lebuh kitai bekenaka teks dalam siti-siti gambar.

8. Simpan video ti udah digaga kitai dalam komputer lalu beri nama ngagai video nya.

Kereban audio-visual

Ayat Tunggal

Ayat Tunggal

Ayat tunggal nya ayat ti ngundan siti klausa aja, lalu iya mega mai siti konstituen subjek enggau siti konstituen predikat. Nya alai, ayat tunggal, sama sebaka enggau ayat ti bukai endang tumbuh ari ayat pelasar. Enti diperatika ari chunto ti udah, dia pasuk ayat pelasar bisi konstituen subjek ti datai dulu ari konstituen predikat. Pasuk ayat tunggal endang sama sebaka enggau ayat pelasar, iya nya sama mai siti konstituen subjek enggau siti konstituen predikat.

Subjek	Predikat
Ajan	macha surat kabar.
Indai tuai nya	balat chakah.
Indai Jinit	ke Sibu pagi tadi.
Barak	benung ngansah duku.

Ba atas nya tadi sekeda ari chunto ayat tunggal. Dalam Jaku Iban, enda semua subjek ayat tunggal disempulang enggau predikat. Bisi bida ari aspek tusun iya nya predikat datai dulu ari subjek.  Pekara tu ulih diperatika ba ayat tunsang baka ke di baruh tu.

a)    i.  Ajan macha surat kabar.

ii. Macha surat kabar Ajan.

b)    i.  Indai tuai nya balat chakah.

ii. Balat chakah indai tuai nya.

c)    i.  Indai Jinit ke Sibu pagi tadi.

ii. Pagi tadi ke Sibu Indai Jinit.

d)    i.  Barak benung ngansah duku.

ii. Benung ngansah duku Barak.

Bida antara ayat tunggal enggau ayat pelasar iya nya semua ayat pelasar datai ari ayat penerang, tang ayat tunggal nya datai ari ayat tanya, ayat perintah, ayat tekenyit, enggau ayat ti bukai. Disimpulka, ayat pelasar enggau ayat tunggal sama ngundan siti konstituen subjek enggau konstituen predikat. Dua bengkah ayat tu dipeda sama tukuh enti diperatika ari ayat penerang. Taja pia, enti ayat tunggal ti betukuh ayat penerang berubah baka betukar endur subjek-predikat iya, dia ayat tunggal nya ukai ayat pelasar agi.

Ayat Pelasar

Ayat Pelasar

Ayat pelasar nya ayat ti nyadi pelasar ayat bukai dalam sesebengkah bansa jaku. Dalam Jaku Iban endang mayuh bendar bansa ayat baikka pandak tauka panjai. Semua ayat nya endang beduduk ari ayat pelasar ti nentuka mayuh macham pola. Pola langkar ayat nya tau mega dikumbai pola ayat pelasar. Ari pola ayat nya tadi tumbuh ayat bukai baka ayat tunggal, ayat kompleks, ayat panjai, ayat pandak, ayat aktif, ayat pasif enggau mayuh ayat ti bukai.

            Dalam jaku Iban, pola ayat pelasar ulih dibagi ngagai empat bengkah lalu bepanggai ba leman ti nyadi konstituen ayat iya nya konstituen subjek enggau predikat. Konstituen subjek suah diisi ngena frasa nama tang konstituen predikat diisi ngena empat bengkah leman ti bebida iya nya frasa nama, frasa pengawa, frasa adjektif enggau frasa jaku penempat. Empat bengkah leman pengisi konstituen predikat tu mih ke nyadi penumbuh empat bengkah pola ayat pelasar dalam jaku Iban.

Pola Ayat Pelasar Jaku Iban

Pola	Subjek	Predikat
Pola 1	Frasa nama Manggas	Frasa nama pengajar ba sekula nya.
Pola 2	Frasa nama Indai Rawing	Frasa pengawa nyumai asi.
Pola 3	Frasa nama Indu nya	Frasa Adjektif bajik amat.
Pola 4	Frasa nama Rumah kami	Frasa Jaku Penempat di Ulu Engkari.

            Ba chunto pola ayat pelasar baka ke ditunjukka nya, konstituen subjek enggau predikat ulih mai dua leka jaku tauka lebih. Konstituen mega ulih nyadi ari siti leka jaku aja. Enti disimpulka sekali, empat iti pola ayat pelasar nya tau dipeda baka tu:

Pola 1: Frasa Nama + Frasa Nama                (FN + FN)

Pola 2: Frasa Nama + Frasa Pengawa           (FN + FK)

Pola 3: Frasa Nama + Frasa Adjektif             (FN + FA)

Pola 4: Frasa Nama + frasa Jaku Penempat (FN + FJP)

Leka Jaku

Leka Jaku

Leka jaku tu konstituen bagi frasa. Leka jaku tu unit ti pemadu mit lalu iya ulih bediri kediri. Leka jaku tu enda ulih dibagi tauka dipechahka ngagai unit ti mit agi laban leka jaku tu endang betukuh meras sereta unit ti pemadu mit lalu ngembuan reti ke menyana. Taja pia, bisi sekeda raban jaku baka orang mayuh enggau baju burung enda ulih dikumbai leka jaku laban ulih dipechahka ngagai unit ti mit agi lalu mai fungsyen jalai jaku lalu nya tau dikumbai frasa. Nangkal ke nya mega, kitai mesti ingat leman baka di...ka, eng-, me...ka enggau ti bukai enda tau dikumbai kitai leka jaku laban leman ti baka tu enda ulih bediri kediri. Tiap leman nya endang bisi ngembuan fungsyen jalai jaku. Leman nya tadi dikumbai kitai morfem.

            Bepanggai ba fungsyen enggau bungkur guna iya dalam atur jalai jaku, dia tiap-tiap leka jaku tau diripih ngagai mayuh bengkah. Dalam jaku Iban mayuh bendar ripih leka jaku baka jaku nama, jaku pengawa, jaku adjektif enggau ripih jaku ti ukai batang leka jaku baka jaku penempat, jaku penyambung enggau ti bukai.